Thumbnail

რეცენზია: Black Thought - Streams of Thought, Vol. 2: Traxploitation

გიორგი ნონიაშვილი პროფილის ფოტო
გიორგი ნონიაშვილი

ლეგენდარული The Roots-ის ფრონტმენს, ბლექ თოთს განსაკუთრებული წარდგენა არ სჭირდება. ეს, ერთი შეხედვით, ბენდის წარმატებაში ჩაკარგული ემსი ჰიპ ჰოპის ისტორიაში ერთ-ერთი საუკეთესო ლირიკოსია. თუმცა, აქამდე არტისტის შემოქმედებაში არ არსებობდა სათანადო სოლო ნამუშევარი, რომელიც მხოლოდ მისი შესაძლებლობების წარმოჩენაზე იქნებოდა ორიენტირებული.

სოლო რელიზების Streams of Thought მეორე ნაწილი ნათლად ამტკიცებს იმას, რაც ჰიპ ჰოპის ერთგულმა მსმენელმა უკვე იცის - რეჩიტატივის კითხვაში თარიქ ტროტერს ბადალი არ ჰყავს. მის შესრულებას ფონად ლეგენდარული პროდიუსერის, სალაამ რემის ინსტრუმენტალი დაჰყვება, რომელიც რეპერს ლაივ დრამებით, გიტარის რიფებითა და სოულის ელემენტებით ამარაგებს. თავის მხრივ, ემსი იმ საჭირბოროტო საკითხებს ეხმიანება, რომლებიც თანამედროვე ამერიკელებს აწუხებთ. თუმცა, ბლექ თოთის ლირიკაში ვერ შეხვდებით ბანალურ კლიშეებსა და ხელოვნურად პოლიტიზებულ აზრებს. ძალიან ხშირად, არტისტის შესრულება იმპროვიზაციას გვაგონებს, რაც მხოლოდ მის უდიდეს ტალანტზე მეტყველებს.

ამ ყველაფერს ბლექ თოთი 9 ტრეკის განმავლობაში ძალზე საინტერესოდ აკეთებს და მსმენელის ყურადღებას არ კარგავს. თანამედროვე სამყაროში, სადაც თრეფ ჟღერადობა და უაზრო რითმები მეინსტრიმის ნაწილია, ორი გენიოსის კოლაბორაციული ნამუშევარი რელევანტურობას ინარჩუნებს. კლასიკური ჰიპ ჰოპი ცოცხალია და თავს კარგად გრძნობს.

გაზიარება

კომენტარები

ბოლოს დამატებული